Бөлүмдөр
Жекшемби, 21-июль
Ош облусуӨзгөн району 02.05.2019 12:59 На русском

Матраимовдорду улай… Өзгөндө дагы бир депутаттын үй-бүлөсү спорттук мелдештерди өткөрдү (сүрөт)

Өзгөн шаарынын борбордук стадиону
Өзгөн шаарынын борбордук стадиону

Turmush -  Кечээ, 1-май күнү Өзгөн шаарынын борбордук стадионунда Жогорку Кеңештин депутаты Улукбек Ормоновдун («Бир Бол») атасы Зулпукаар Ормоновдун жаркын элесине арналган спорттук мелдештер өткөрүлдү. Бул тууралуу Өзгөн районунун спорт комитетинин адиси Эркинов Калдар аймактык кабарчыга билдирди.

Мелдештер спорттун кол күрөш, волейбол, футбол, шахмат түрү боюнча жана улуттук оюндардан таяк тартыш, ордо, тогуз коргоол боюнча өткөн.

К.Эркиновдун айтымында, иш-чарага ЖКнын депутаттары Улукбек Ормонов, Аалы Карашов, ЖКнын вице-спикери Аида Касымалиева, экс-депутаттар Ахматбек Келдибеков жана Кыргызстандын Волейбол федерациясынын президенти Элмурза Сатыбалдиев, Өзгөн районунун акими Бактыбек Алайчиев жана Өзгөн районуна караштуу 19 айыл өкмөттүн, Өзгөн шаарынын спортчулары, жашоочулары катышкан.

«Катышуучулар жөө жүрүш жасашып, андан соң депутаттар сөз сүйлөштү. Мелдештин жеңүүчүлөрүнө грамоталар жана медалдар тапшырылып, акчалай сыйлыктар берилди. Волейбол боюнча мелдештин баш байгеси 100 миң сомду түздү», - деди К.Эркинов.

Зулпукаар Ормоновдун жаркын элесине арналган спорттук иш-чаралар жыл сайын 1-май күнү өткөрүлүп келет.

Буга чейин Turmush басылмасы Кара-Суу районунун Жоош айыл өкмөтүнө караштуу Большевик айылында Жогорку Кеңештин депутаты Искендер Матраимов негиздеген «Исмаил ата» фонду бир катар спорттук мелдештерди уюштурганын жазган.

Ага Жогорку Кеңештин төрагасы Дастан Жумабеков, вице-спикер Мирлан Бакиров («Өнүгүү-Прогресс»), бир катар депутаттар, биринчи вице-премьер-министр Кубатбек Боронов, Улуттук статистика комитетинин төрагасы Акылбек Султанов, өкмөттүн Жалал-Абад облусундагы ыйгарым укуктуу өкүлү Кыянбек Сатыбалдиев, Ош облусундагы ыйгарым укуктуу өкүл Узарбек Жылкыбаев, Кыргызстандын Өзбекстандагы элчиси Ибрагим Жунусов, экс-депутат Нариман Түлеев, Волейбол федерациясынын президенти Элмурза Сатыбалдиев, парламенттин экс-спикери Ахматбек Келдибеков, ички иштер министринин мурунку орун басары Данияр Абдыкаров, ошондой эле учурдагы жана мурунку жетекчилер, ардагерлер жана жашоочулар күбө болушкан.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×