Бөлүмдөр
Бейшемби, 22-август
Ош облусуӨзгөн району 18.03.2019 16:52 На русском

Дүйнөнүн 7 жолку чемпиону аталып, 2 «Нива» уткан: Жылына 4 млн сом тапкан өзгөндүк фермер (сүрөт)

Turmush -  Өзгөн районундагы Баш-Дөбө айыл өкмөтүнө караштуу Кашка-Терек айылынын 70 жаштагы тургуну Туратбек Маматов 50 жылдан бери кой, эчки, жылкы багып, мал чарбачылыгы менен алектенет. Ал Союз мезгилинде эң көп төл алгандыгы үчүн Айыл чарба жана мелиорация министрлиги тарабынан «Нива» үлгүсүндөгү унаа менен сыйланган. Фермер менен аймактык кабарчы таанышты.

Туратбек мырза ат оюндарынын көк бөрү, оодарыш, тыйын эңмей, човган, сюрпапах (човган жана сюрпапах оюндары Тажикстан жана Азербайжандын улуттук ат оюндары катары саналат) түрлөрү боюнча бир нече жолу дүйнөнүн жана Кыргызстандын чемпиону аталган.

«Атам жылкычы болгон. Бала кезимден бери малды кантип караш керек, аларды кантип көбөйтүш керек экендигин атамдан үйрөнгөм. Алгач эчки багып көргөм. Кийин 200 кой сатып алып, аларды гиссар тукумундагы кочкорлор менен аргындаштырып, эт өндүрүү максатында койдун санын көбөйттүм. 1985-жылы эң көп төл алганым үчүн мамлекет тарабынан «Нива» үлгүсүндөгү унааны белекке алгам. Учурда койдун жалпы саны 1 миң 300гө жетти. Жылкынын саны 40 баш, анын жыйырмасы жакында тууйт», - деди ал.

Фермердин чарбасы 150 гектар жерди ээлесе, анын 2 гектарында кой короолор жайгашкан.

«Мал-жандыктардын саны көбөйгөн сайын алардын короо-жайын дагы кеңейтип туруу керек. Азыр чарбанын аянты 150 гектарды түзөт. Анын 25 гектарына арпа айдап, тоют камдайм. Калган 125 гектары жайыт жер. Чыгаша болбосо, киреше кайдан келсин. Мал жандыктын качан өлүп, эмне болорун билбейсиң да. Өлгөндөрү болот. Ар жылы айылдагы аз камсыз болгон үй-бүлөлөргө, жетим-жесирлерге бирден кой берип турам. Союп, ооруканаларга таратам. Чарба өзүн актайт, бизди багат. 5 койчум бар. Алардын үй-бүлөсүн дагы камсыздайбыз. Бир жылда 30 тонна арпа алабыз. 60 тонна жемди даярдап же сатып алам. 6 миң таңгак беде, саман камдайбыз. Тоютка 1 миллион сомдон ашык акча коройт. Бир жылдык кирешем 4 миллион сомду түзөт. Койчуларга айына 15 миң сомдон айлык төлөйм», - деди Туратбек Маматов.

Анын айтымында, бала чагынан бери спорт менен машыккандыктан жашы жетимишти таяп калса да 30 отжимания жасай алат.

«Бала кезимден ат оюндарына кызыгып, 16 жашымдан баштап райондук ат оюндары боюнча мелдештерге катышчумун. 25 жашымда Россиянын бир катар шаарында өткөн ат оюндарына катышып, дүйнөнүн жети жолку чемпиону жана Кыргызстандын 5 жолку чемпиону болгом. Ал оюндан топтогон упайларым үчүн 1981-жылы мамлекет тарабынан "Нива" үлгүсүндөгү унааны белекке алгам. Азыр спортту таштаган жокмун. 2018-жылы Өзгөн райондук спорт комитети тарабынан "Спорттун мыкты ардагери" деген наам ыйгарылган»,- дейт фермер.

Туратбек Маматов 6 уул жана 5 кыздын атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×