Бөлүмдөр
Бейшемби, 22-август
Ош облусуӨзгөн району 07.10.2016 08:49

Айыл турмушу: Өзгөндүк С.Абдымусаев 10 тоннага чейин күрүч жыйнап, Америка менен Россияга экспорттойт (фото)

Turmush -  Өзгөн районундагы Баш-Дөбө айылынын тургуну Самарбек Абдымусаев бала чагынан бери күрүч өстүрөт. Ал жылына 10 тоннага чейин шалы өндүрүп, Россия, Америкага чейин жөнөтөрүн аймактык кабарчы менен болгон маегинде билдирди.

Күрүчтүн чемпион, казим, орозбай, кара кылдырык сыяктуу түрлөрүн Самарбек мырзанын талаасынан көрүүгө болот.

«Шалы өстүрүү мен үчүн жаңылык эмес, бул ата-бабамдан өтүп келе жаткан кесип. Шалы өстүрүү башка өсүмдүктөргө салыштырмалуу кыйын. Ал сууну сүйгөн өсүмдүк.

Алгач жерди айдап, суу жакшы кармалгыдай абалда, суу тегиз жаткыдай төрт бурчтук кылып даярдап алабыз. Ал жер пал деп аталат. Ылай шыбалган палга суу толтурулгандан кийин ичин чөп-чар, тамырлардан тазалап чыгабыз. Күрүчтүн даны чоң болушу үчүн убагында дары беребиз. Мен 5 гектар жерге шалы эгем. Күрүчтөрдү данынан карап айырмалайбыз», - деди С.Абдымусаев.

Өзгөчө даамга ээ болуп, той-аштарда көп колдонулган кочкул кызыл түстөгү күрүч чемпион деп аталат.

1

«Өзгөн күрүчү деп чемпионду атап жүрүшөт. Чемпион күрүч кадимки күрөчтөрдөй эле өсөт. Бышкандан соң чемпион күрүчтү 10 күн комбайнга жанчбай, боек беребиз. Жанчылып, комбайндан чыккандан кийин кызыл болуп чыга келет. Бул күрүчтөрдүн баасы да кымбат», - деди ал.

Кыргызстан Бажы биримдигине киргенден кийин күрүчтүн өтүмдүүлүгү жакшы болуп баратканын кошумчалады.

«Өткөн жылы күрүч көп болгондуктан кетирген чыгымыбыз акталбай калган. Быйыл күн ысык болуп, шалы эрте бышты. Баасы да жакшы болуп жатат. Өткөн жылы килограммын 80 сомго сатсак, быйыл 110 сомдон түшүрбөй сатып жатабыз. Россия, Америкадагы кыргыз боордошторго күрүч жөнөтүп турам. Бажы биримдигине киргенден кийин чет өлкөгө күрүч жөнөтүү оңой болуп калды», - деди С.Абдымусаев.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×