Бөлүмдөр
Бейшемби, 22-август
Ош облусуӨзгөн району 15.06.2016 12:59

Айыл турмушу: Шамшиевдердин үй-бүлөсү бактын тамырынан жыландарды, жыгачтан идиш-аяктардын түрүн жасайт (фото)

Turmush -  Өзгөн районундагы Чарба айылынын тургуну Жылдызбек Шамшиев көп жылдан бери устачылык менен алектенет. Ал ашканага керектелүүчү бардык идиштерди жыгачтан жасап чыксам деп ниеттенүүдө. Дарактын тамырынан жыландын элесин жасаган уста, кызыккан балдарга өз өнөрүн акысыз үйрөтөт.

«Менин атам, чоң атам уста болушкан. Устачылык мага тукумдан өткөн. Жыгачтан музыкалык аспаптарды, күнүмдүк турмушта пайдалануучу идиш-аяктарды жасайм. Өрүктүн, жаңгактын, долононун жыгачтарын пайдаланам. Өрүктөн музыкалык аспаптар жакшы жасалат. Өрүктөн жасалган комуз жакшы ырдайт, күүгө тез келип, жакшы күүлөнөт.

Ал эми жаңгактын жыгачы катуу болгондуктан, идиш-аяктарды жасайбыз, ал ысык-суукка чыдамдуу болот. Бардык идиш-аяктарды жыгачтан жасап чыксам деп максат койдум.

Долоно менен ак чечектен шахматтар жасалат. Ар бир нерсенин өзүнө жараша түйшүгү болот. Жыгач менен иштөө оңой эмес», - деди Ж.Шамшиев.

Өнөр ээси мындан сырткары тамырлардан ар түрдүү образдарды жаратат.

«Мен суу ташкындагандан кийин жээктерден дарактын түрдүү формадагы тамырларын таап келем. Суунун агымы менен келип калган тамырлар да болот. Аны өзүмдүн фантазияма жараша иштеп чыгам. Тамыр чырмалып өскөндүктөн андан жыландын элестерин көп жасайм. Бир эмгегимде сойлоп жүрүүчүлөрдүн энеси кобра менен аксакалдын достугун чагылдыргам. Элдик уламыштарда айтылгандай, илгери Өзгөндө бир ажыдаар пайда болуп, адамдарды жей берчү экен. Ага Бурхан баатыр кылычы менен каршы чыгып, женген. Ал көптөгөн адамдарды өлүмдөн алып калган баатыр болгон деп айтылып жүрөт. Тамырлардан Кылыч Бурхандын да образын жараттым», - деди ал.

Устанын 7 баласы бар. Улуу баласы Мундуз да атасынын жолун жолдоп келе жатат.

«Мен азыр шахматтын тактайчаларын жасайм. Барын атамдан үйрөнгөм. Атам жасап баштаганда эле жанынан чыкпай калам. Мен үчүн аябай кызык. Бир деталын жасасам эле кооз көрүнө берет. Бир буюм жасагандан кийин, өзүң эле кызыгып, фантазия менен иштей берет экенсиң», - деди М.Жылдызбек уулу.

Шамшиевдер таланттуу үй-бүлө, деп кошумчалады айылдагы Батмакан Бекташова атындагы маданият үйүнүн жетекчиси Аширакан Кунаева.

«Мен аларды көптөн бери тааныйм. Мага дагы өздөрүнүн колдорунан чыккан эмгектерин белекке беришкен. Булар өтө чыгармачыл үй-бүлө. Быйыл комуз ийримине катышкан окуучулардын барына комуз чаап беришти», - деди ал.

Уста быйыл жыгачтан жасалган идиш-аяктарга суроо-талап көбөйүп жатканын кошумчалады.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×