Бөлүмдөр
Бейшемби, 22-август
Ош облусуӨзгөн району 11.05.2016 10:14

Айыл турмушу: 2 жашында дарыгерлердин катасынан баспай калган Мээргүл 2 баланын сүйүктүү апасы жана шаарга белгилүү чебер (фото)

Turmush -  Өзгөн районундагы Зергер айылынын тургуну Мээргүл Дөөлөтбаева бир топ жылдан бери үйүндө жиптен түрдүү кийимдерди түйүп, баштыкчаларды жасайт. Ал тиккен буюмдарды кардарлары үйүнөн сатып алышат. Түймөнүн сырларын өз алдынча өздөштүргөнүн айтат. 2 жашымда дарыгердин туура эмес дарылоосунан улам баспай калдым деген Мээргүл учурда 2 баланын мээримдүү энеси.

«Мен 5 бир тууганмын. Апамдын айтымында, мен 2 жашымда ооруп, апам дарыгерге алып барган. Дарыгерлердин туура эмес дарылоосунан улам баспай калгам. Ошондон бери майыптар арабасында жүрөм. Бирок менин абалым чыгармачылыгыма тоскоол боло албайт. Мен ар бир жасаган эмгегимден эргүү алам. Түймөчүлүк өнөрдү деле эч кимден үйрөнгөн эмесмин. Базардан бир шапканы алып келип, аны сөгүп, кантип тигилгенин өздөштүрдүм. Учурда балдарыма кийимдердин түрүн түйүп берем», - деди М.Дөөлөтбаева.

Мээргүлгө жиптерди сиңдилери алып келип берет. 

«Кышкысын көп түймө түйөм. Кардарларым каалагандай кийимдерди түйүп берем. Мага көбүнчө жаш балдардын кийимдерине буюртмалар түшөт. Бош убактымда сумкаларды түйөм. Баалары да базар баасына караганда арзан, 100 сомдон 500 сомго чейин», - деди М.Дөөлөтбаева.

Мээргүлдүн эки буту баспаганы менен бардык нерсени сезип, кыймылдайт. Болгону басуу үчүн күч-кубат жок.

29 жаштагы Мээргүл айымдын улуу баласы Эламан 1-класста жалаң гана «5» деген бааларга окуп жатат. Ал эми кичүүсү Баястан 4 жашта. Наристелердин шаңга толгон күлкүсү аны жашартып, жашоого үмүт берет.

Мээргүл менен жолдошу 2 уулун татыктуу тарбиялоону максат кылышат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×