Бөлүмдөр
Бейшемби, 22-август
Ош облусуӨзгөн району 03.04.2016 14:41

Айыл турмушу: Өзгөндөгү суунун агымына байланыштуу аты калган Ийри-Суунун жыландар байырлаган, жаңгакка бай айылдары (фото)

Turmush -  Ош облусуна караштуу Өзгөн районунун Ийри-Суу айыл өкмөтү Чаңгет сайындагы суу ийри багытта аккандыгынан улам аталып калган. Айыл аймак тууралуу билген маалыматтарын аталган айылдын тургуну Карыбек Асанбеков Turmush басылмасынын кабарчысына айтып берди.
Анын айтымында, Ийри-Суу айыл өкмөтү түзүлгөнгө чейин мындагы эл Чаңгет сайы тарапта отурукташкан.

«Бул аймакта эң алгач "Жарыя" совхозу уюшулуп, кийин Ийри-Суу совхозу уюштурулган. 1928-жылдары Ийри-Суу совхозу 8 бөлүмгө бөлүнгөн. Совхоздун басымдуу бөлүмүн орус улутундагылар түзүп, ар бир бөлүмүндө 50-60 түтүн эл жашаган. Кийин жашоого ыңгайлуу, сугат жерлерде орустар отурукташып, кайрак жерлерге кыргыздар жайгашып калган. Андан улам орустар менен кыргыздардын ортосунда келишпестик пайда болуп, совхоздогу 8 бөлүмдүн төртөө кыскартылган.

1-бөлүм Оргазган айылында, 2-бөлүм Ак-Чечекте, 3-бөлүм Ийри-Сууда, 4-бөлүм Кара-Колотто, 5-бөлүм Ак-Теректе, 6-бөлүм Михайловкада, 7-бөлүм Казармада, ал эми 8-бөлүм Чаңгетте болгон. Кийин басмачылардын айынан Казарман менен Михайловка Жалал-Абадга өткөн.

Ийри-Суунун түптөлүшүнө Чаңгет айылынын салымы чоң. Анткени мурун бул жерлер жайлоо гана болуп келген. Акырындык менен эл отурукташып, айыл негизделген», - деди К.Асанбеков.

Ал белгилегендей, Ийри-Суу айыл өкмөтүндө жапайы жаңгактын мекени болгон Жаңгакты айылы орун алган. Ал жердин тескей тарабында жапайы жаңгактар өсүп, күңгөй бетинде жашоочулар отурукташкан.

Ал эми Жылалды айылы жылан байырлаган жер деген түшүнүктөн улам аталып калган. Учурда бул айыл да Ийри-суу айыл өкмөтүнүн карамагында.

Жергиликтүүлөрдүн айтымында, калк отурукташкан алгачкы жалдарда бул чөлкөмдө жылан көп болгон. Ошондон улам жыланы бар айыл Жыланды айылы болуп айтылып калган. Убакыттын өтөшү менен Жыланды айылынын аталышы Жылалды болуп өзгөртүлгөн.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×