Бөлүмдөр
Шейшемби, 17-сентябрь
Ош облусуӨзгөн району 26.08.2015 09:59

Өзгөндүн Көлдүк айылынын тургуну ага түн ичинде курал менен кол салган айылдаштары камакка алынбай жаткандыгын айтууда

Turmush -  Өзгөн районунун Көлдүк айылынын тургуну Данияр Тайчиев 22-июлга караган түнү белгисиз 9 бала тарабынан ур-токмокко алынды. Алардын жанында ок атуучу курал, арматура, бычак да бар болчу, деп билдирди Данияр Тайчиевдин тууганы Дүйшөнбай Тайчиев.

«21-июль күнү түнкү саат 12 чамасында Тайчиева Канышай (Даниярдын апасы) телефондон чалып, үйүнө топ балдар келгендигин айтты. Мен Өзгөн районунун милиция кызматкерлерине билдирип, тергөөчү Эрматов Бактыбек баш болуп чыр чыккан Көлдүк айылына бардык. Ал жерден К.Э., З.А., М.К. аттуу жергиликтүү тургундар кармалып, алардын «Хонда-Одиссей» унаасынан ок атуучу курал чыкты. Аларды тергөөчү менен Мырза-Аке аймактык милициясы түнкү саат 04:00дө кармап, камакка алышты.

Бирок кармалгандарды тергөөчү 23-июлда кайра эле чыгарып жиберген.

Тергөөчү, подполковник Б.Эрматов шектүүлөрдүн бошотулушуна байланышкан суроолорума толук жооп бербей, «Хонда-Одиссей» унаасынан чыккан мылтык жөн гана металл экендигин айтты. Бирок окуя болгон күнү унаадан ок атуучу мылтык табылганын көргөнбүз.

Бул иш боюнча Өзгөн РИИБдин башкы тергөөчүсү Заир Төрөгелдиевге да кайрылдым, ал табылган мылтык ок атуучу курал экендигин айтты.

Бул ишке байланыштуу биздин туугандар кайрадан арыз жазып, 24-июлда шектүүлөр кайрадан камакка алынган. Бирок, шектүүлөргө жеңил берене менен айып таккан Өзгөн районунун соту Бакыт Сарыбаев менен тергөөчү Б.Эрматов 26-июлда аларды үй камагына чыгарган.

Үй камагына чыгаруу тууралуу чечим чыгаруу учурунда балдар кол салган күнү алардан табылган ок атуучу курал, чалгы, арматура, мал соё турган бычак табылгандыгы эске алынган эмес. Бул куралдар жаап-жашырылган.

Андан кийин бул ишти тергөөчү Рахманали Тайчабаров карап чыгып, шектүүлөрдүн ичинен К.Э., З.А., Ош облустук сотунун кечээ, 25-августтагы чечими менен камакка алынды. Калган шектүүлөр качып жүрөт», - деди Д.Тайчиев.

Ал эми ИИМдин Ош шаары жана Ош облусу боюнча башкы башкармалыгынын басма сөз кызматынын билдиргенине ылайык, курал менен зомбулук көрсөтүлгөн эмес жана бейбаштык боюнча шектүүлөр камакка алынды.




Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×